မူလစာမျက်နှာ

ဘယ်တော့များမှ ပြည့်ပါ့မယ်..

08 March 2010

ငယ်ငယ်တုန်းက ကြားဖူးတဲ့ စကားလေးတစ်ခွန်းရှိပါတယ်။ “လူ့အလို နတ်မလိုက်နိုင်” ဆိုတဲ့ စကားလေးပါပဲ။ လူတွေရဲ့ အလိုရှိမှုတွေ များပြားမှုကြောင့် လိုရာကိုဖန်ဆင်းပေးနိုင်တဲ့ နတ်တောင် ထွက်ပြေးရတဲ့ အဖြစ်မျိုးကို ဆိုလိုခြင်းပါပဲ။ ပုံပြင်လေးရဲ့ အဓိပ္ပါယ်ပြည့်ပြည့်၀၀ကို အရင်က သေချာမသိခဲ့မိပါဘူး။ ခုတော့.. ဒီစာလေး ဖတ်မိရင်း သဘောကျမိပါတယ်။ လူတစ်ယောက်ရေဆာနေတာကို သနားတတ်သော ညောင်ပင်စောင့်နတ်က သောက်ရေအေးအေးလေး ဖန်ဆင်းပေးမိရကနေ.. နောက်ဆုံး အရာရာကို ဖန်ဆင်းပေးနိုင်တဲ့ ညောင်ပင်စောင့်နတ်ရဲ့ လက်ညှိုးကို ဖြတ်ပေးခဲ့ဖို့ တောင်းဆိုတဲ့အထိ ဖြစ်ခဲ့ရတာပါ။ ဒီတော့.. တန်ခိုးရှိတဲ့ ညောင်ပင်စောင့်နတ်လည်း ဒီလူသားရဲ့အလိုဆန္ဒကို ကြောက်လွန်းသဖြင့် သူနဲ့ဝေးရာကို ထွက်ပြေးသွားရတဲ့အထိပါပဲ။ အော်.. လောဘဆိုတဲ့ လိုချင်မှုတွေများမှု့ကြောင့် အရာရာကို ဖန်ဆင်းပေးနိုင်တဲ့နတ်တောင် ထွက်ပြေးရတဲ့အထိပါပဲ။ ဒါ့ကြောင့်မလို့များ လူတွေကို နတ်တွေက ကိုယ်ရောင် မပြတာလို့များတောင် ထင်မိပါရဲ့..။ ကိုယ်ရောင်ပြမိတဲ့ နတ်လည်း အတောင်းကျန်းတဲ့ လူတွေနဲ့တွေ့မိရင် ချက်ချင်းကို ဘ၀ပြောင်းသွားမယ် ထင်ပါတယ်။ ဒါပေမယ့် လူတွေက မတောင်းပဲ.. လူတွေဆီက ပြန်တောင်းနေတဲ့ နတ်တွေတော့ အပြင်မှာ ကလို့ကောင်းတုန်း.. သောက်လို့ကောင်းတုန်းပါပဲ။ သူတို့လည်း လူတွေရဲ့ လောဘနဲ့မတွေ့သေးလို့ ကနိုင်သောက်နိုင်သေးတယ်ထင်ပါ့။

Read 2 Comments... >>

တစ်နှစ်ပြည့်ခြင်းနှင့်အတူ..

02 March 2010

ကျွန်တော်ဘလော့စရေးခဲ့တာဟာ အခုဆိုရင် တစ်နှစ်ဆိုတဲ့ အချိန်တိုင်းတာကို ရောက်ရှိခဲ့ပါပြီ။ တစ်နှစ်ဆိုတဲ့အချိန် အတိုင်းတာနဲ့အတူ.. ကျွန်တော့်ဘလော့ကို လာရောက်ကြပြီး ဓမ္မအသိများလာရောက် အသိပွားကြတဲ့ ဓမ္မမိတ်ဆွေများရဲ့ အားပေးမှုများကိုလည်း သာဓုခေါ်မိပါတယ်။ တစ်နှစ်ထက်တစ်နှစ် ဘုရားရှင်ရဲ့အဆုံးမတွေကို လေ့လာမှတ်သားမိသလောက်လေး ဖြန့်ဝေပေးနေအုံးမှာပါ။ ဒီလိုဖြန့်ဝေပေးတယ်ဆိုတာလည်း တအားကြီး သိလွန်းတတ်လွန်းလို့ မဟုတ်ဘူးဆိုတာလေးကို ဦးစွာပထမ ၀န်ခံလိုပါတယ်။ ကျွန်တော်ရဲ့ ဓမ္မစာပေတွေကို ဖတ်မှတ်တဲ့ အခါမှာလည်း.. ကျွန်တော်ပြောတာကိုပဲ အမှန်လို့ လက်ခံရမယ်ဆိုပြီး ယူဆမထားပါဘူး။ ဓမ္မမိတ်ဆွေအပေါင်းလည်း ကိုယ့်ရဲ့ရင်ထဲနှလုံးသားထဲမှာ ရှိတဲ့အသိတရားတွေ.. ဝေဖန်ဆန်းစစ်နိုင်တဲ့ အသိဥာဏ်ပညာတွေနဲ့ လေ့လာပြီး မှား၏ မှန်၏ဆိုတာကို ဆုံးဖြတ်စေချင်ပါတယ်။ ကျွန်တော်လည်း ပုထုဇဉ်ဖြစ်တဲ့အတွက် အမှားမကင်းနိုင်သေးသောကြောင့် ယခုလို ဦးစွာပထမ သတိပေး ပြောဆိုလိုက်ရတာပါ။

Read 5 Comments... >>

ကိုးကွယ်ရာမှာရွေးချယ်ပါ..

24 February 2010

“ကြည်ညိုရာမှာ များသံဃာ.. ကိုးကွယ်ရာမှာရွေးချယ်ပါ” ဆိုတဲ့စကားလေးဟာ ဗုဒ္ဓဘာသာဝင်တွေအတွက် အင်မတန် အရေးကြီးတဲ့ ဆုံးမစကားလေးပါပဲ။ ယခုခေတ်အချိန်အခါမှာ တရားအားထုတ်တဲ့ ယောဂီတွေ များလာသလို.. တရားရိပ်သာတွေလည်း အများအပြား ပေါ်ထွက်လာပါတယ်။ ဘုရားရှင်ရဲ့ အဆုံးမတွေကိုလည်း ရဟန်းသံဃာများရော.. လူပုဂ္ဂိုလ်များပါ.. ဖြန့်ဝေပေးနေကြတဲ့သူတွေလည်း များစွာ ပေါ်ထွက်လာပါတယ်။ အကောင်းဘက်မှ စဉ်းစားရင် အင်မတန်မှ ၀မ်းသာကြည်နူးဖို့ ကောင်းသလို.. တစ်ဖက်မှ စဉ်းစားကြည့်ပြန်ရင်လည်း အင်မတန်မှ အလေးဂရုပြုဖို့ ကောင်းပါတယ်။ “ကုန်ရှုံးတော့တစ်ခေါက်.. လင်ကုန်ရှုံးတော့ တစ်သက်လုံးမှောက်.. ဆရာကုန်ရှုံးတော့ တစ်သံသရာလုံးမှောက်” ဆိုတဲ့ စကားလေးကလည်း တရားအားထုတ်မယ့် ယောဂီတွေအတွက် အမြဲနှလုံးသွင်းထားသင့်တဲ့ စကားလေးပါ။ ကျန်တဲ့အရာတွေ အရွေးမှားရင်တော့ တစ်ဘ၀စာထက်ပိုပြီး မဆုံးရှုံးနိုင်ပေမယ့် ဆရာရွေးမှားရင်တော့ဖြင့် တစ်သံသရာလုံးပါ ဆုံးရှုံးသွားနိုင်မယ့် အဖြစ်မျိုးပါ..။ ဒါမို့လို့လည်း ဂရုပြုဖို့ကောင်းတယ်ဆိုတဲ့ စကားလေးကို သုံးလိုက်ရတာပါ။

Read 0 Comments... >>

ဓမ္မနဲ့ဘ၀ထပ်တူကျလိုက်ရင်..

24 February 2010

ဆန္ဒနဲ့ဘ၀ ထပ်တူကျသူတို့၏ဘ၀က ပျော်စရာကောင်းလှတယ်ဆိုပေမယ့်..
ဓမ္မနဲ့ဘ၀ ထပ်တူကျသူတို့၏ ဘ၀က ပို၍ နှစ်သက်စရာကောင်းပါတယ်။ (သုခရိပ်)

ကျွန်တော့်အစ်ကိုကြီး သုခရိပ်(ဓမ္မသုခ) တင်ထားတဲ့ စာသားလေးပါ။ ဒီစာသားလေးဖတ်မိပြီး ရင်ထဲမှာ အတော်လေး နှစ်သက်ကြည်နူးမိပါတယ်။ စဉ်းစားရင်း စဉ်းစားရင်း.. ပိုပြီးတော့ သဘောကျမိပါတယ်။ ဒီစာလေးမဖတ်ရမိသေးခင် ကိုယ့်ဘာသာ စဉ်းစားကြည့်မိတာလေးတွေ ပြောချင်ပါသေးတယ်။ မိဘတွေ ဆရာသမားတွေ ကန်တော့တဲ့အခါတွေကျရင် ဆန္ဒနဲ့ဘ၀ တစ်ထပ်တည်းကျပါစေလို့ ဆုပေးတတ်ပါတယ်။ အဲ့တုန်းကတော့ ကိုယ့်ဘာသာစဉ်းစားပြီး.. အော်.. ဆုပေးတာလေးက ကောင်းလိုက်တာလို့ တွေးမိပါတယ်။ ကိုယ်ဖြစ်ချင်တဲ့ ဆန္ဒနဲ့ ကိုယ်ဖြစ်နေတဲ့ဘ၀ ထပ်တူကျရရင် ဘယ်လောက်ကောင်းလိုက်မလဲပေါ့နော်။ အဲ့တုန်းကတော့ ကိုယ့်ဘာသာစဉ်းစားရင်း.. ဟုတ်လှပြီပေါ့..။ ဒါပေမယ့်လည်း.. ဆန္ဒနဲ့ဘ၀ ထပ်တူကျတယ်ဆိုတာ အရှားသား မဟုတ်ပါလား.. ဖြစ်ချင်တဲ့ဆန္ဒနဲ့ ဖြစ်နေတဲ့ဘ၀တွေက ထပ်တူမကျတာတွေများပြီး ဆိုးချင်တိုင်း ဆိုးနေတဲ့ဘ၀တွေကလည်း ဒုနဲ့ဒေးပါပဲ။ ဆန္ဒနဲ့ဘ၀ ထပ်တူကျပါတယ်လို့ ဆိုတဲ့သူတွေ ဘယ်နှစ်ယောက်ရှိမှာလဲ..။ “လူ့အလို နတ်မလိုက်နိုင်” တဲ့.. လူတွေရဲ့ဖြစ်ချင်တဲ့ ဆန္ဒတွေနောက်ကိုသာလိုက်ပြီး လုပ်ပေးရရင် အရာရာဖန်ဆင်းပေးပါမယ်ဆိုတဲ့ နတ်တောင် ထွက်ပြေးရတဲ့အထိပါပဲနော်။ အော်.. ဒီတော့ တွေးမိပါရဲ့.. ဆန္ဒနဲ့ဘ၀က ဘယ်အချိန်မှာများမှ ထပ်တူကျနိုင်မှာပါလဲလို့..။

Read 0 Comments... >>

တာဝန်မဟုတ်တဲ့အသိ

24 February 2010

အွန်လိုင်းကနေ အစ်ကိုတစ်ယောက်နဲ့တွေ့ပြီး စကားစပ်မိလို့ ပြောမိတာလေးတွေ ပြန်ပြောချင်မိပါတယ်။ သူ့အကြောင်း ကိုယ့်အကြောင်းလေး အနည်းငယ်ပြောမိပြီး သူလုပ်နေတဲ့အလုပ်လေးတွေနဲ့ ပတ်သက်လို့ သူကပြောပြပါတယ်။ သူပြောတဲ့စကားလေးအတိုင်းပါပဲ.. သူအခု နိုင်ငံရပ်ခြားမှာ အလုပ်လုပ်နေတယ်ပေါ့.. သူနိုင်ငံရပ်ခြားမသွားခင်.. မြန်မာနိုင်ငံမှာ ဗုဒ္ဓဘာသာကလေးသူငယ်တွေအတွက် ယဉ်ကျေးလိမ္မာသင်တန်း ဖွင့်ခဲ့တာ ငါးနှစ်တောင် ရှိသွားပြီး.. သူနဲ့အတူ ဆရာတော်တစ်ပါးနဲ့ သင်တန်းဆရာမနှစ်ဦးက ဦးဆောင်ပြီး ဖွင့်လှစ်ပေးခဲ့တာပါ။ အသိပညာဗဟုသုတ နည်းပါးပြီး ဗုဒ္ဓရဲ့အဆုံးမနဲ့ အလှမ်းဝေးနေတဲ့ ကလေးသူငယ်တွေကို ဗုဒ္ဓရဲ့အဆုံးမတွေ ရင်ထဲရောက်ရှိစေရေး၊ ဘာသာတရားကို တန်ဖိုးထားတတ်စေရေးနဲ့ ကလေးသူငယ်တွေ ယဉ်ကျေးလာစေပြီး အသိဥာဏ်အလိမ္မာ တိုးလာစေရေးတို့အတွက် အဓိကရည်ရွယ်ပြီး ဖွင့်လှစ်ပေးခဲ့တာပါ။ ဘာရံပုံငွေမှလည်းမရှိ ဘယ်သူမှလည်း ထောက်ပံ့မှုမရှိဘဲ ကိုယ်ရဲ့တတ်စွမ်းတဲ့ဘက်ကနေ ကလေးသူငယ်တွေကို အခမဲ့သင်ကြားပေးပြီး အသိပညာတွေ တိုးတက်လာအောင်.. သင်တန်းမတက်ချင်တဲ့ အသိဥာဏ်နုနယ်တဲ့ ကလေးသူငယ်တွေကို.. အစားလည်းကျွေး.. သင်တန်းမှာဆုရတဲ့ကလေးတွေကို ဆုလည်းချပေးပြီး သင်တန်းတက်ချင်စိတ်တွေ ဖြစ်လာအောင် အဖက်ဖက်မှ ကြိုးစားပြီး ဖွင့်လှစ်ပေးခဲ့တာပါ။ ဒီလိုမျိုးလေးတွေနဲ့ စည်းရုံးပြီး သင်တန်းကို ရေရှည်တည်တံ့အောင် စွမ်းဆောင်ခဲ့တာ.. ယခုဆို သင်တန်းမှာ ဗုဒ္ဓဘာသာကလေးသူငယ်တွေ (၁၀၀)တောင် ကျော်သွားပြီလို့ ဆိုပါတယ်။

Read 0 Comments... >>

အရဟံနဲ့ပူဇော်ပါ..

24 February 2010

ဆရာတော်အရှင်ဆန္ဒာဓိကရဲ့ တရားစာအုပ်တွေကို ဖတ်ဖူးမှတ်ဖူးမိတဲ့သူတွေ တော်တော်များများအနေနဲ့ အရဟံရဲ့ အနက်အဓိပ္ပါယ်ဖွင့်ဆိုချက်တွေကို မှတ်သားမိမယ်လို့ ထင်ပါတယ်။ ဆရာတော်ရဲ့စာအုပ်တိုင်းမှာ အရဟံရဲ့ဂုဏ်တော်အဖွင့်ကို အမြဲတမ်း ထည့်သွင်းပူဇော် ရှိခိုးလေ့ရှိပါတယ်။ ဆရာတော်ရဲ့စာအုပ် မဖတ်ရသေးခင်.. ဘုရားရှင်ရဲ့ အရဟံဂုဏ်တော်လေးကို နှလုံးသွင်းပြီး ကြည်ညိုသဒ္ဓါပွားလိုက်ရရင်ကို ရင်ထဲမှာ အလိုလို ငြိမ်းချမ်းအေးမြသွားတာပါပဲ။ အရဟံဆိုတဲ့ အဓိပ္ပါယ်လေးကို သိပြီးသား ဓမ္မမိတ်ဆွေတွေ အနေနဲ့ရော မသိရသေးတဲ့သူတွေအတွက်ပါ ပူဇော်နိုင်ရန် ဖော်ပြပေးချင်ပါတယ်..။ အရဟံ- ကိလေသာ ကင်းစင်တော်မူသော မြတ်စွာဘုရား၊ အရဟံ- ပူဇော်အထူးကိုခံယူတော်မူထိုက်သော မြတ်စွာဘုရား၊ အရဟံ- ဆိတ်ကွယ်ရာအရပ်၌ပင် မကောင်းမှုကိုပြုတော်မမူသော မြတ်စွာဘုရား တဲ့။ ဘုရားရှင်ရဲ့ ဂုဏ်တော်တွေ အားလုံးကို ကြည်ညိုဦးခိုက်ပူဇော်မိပါတယ်.. အဲ့အထဲမှာမှ အရဟံ- ဆိတ်ကွယ်ရာ အရပ်၌ပင် မကောင်းမှုကို ပြုတော်မမူသော မြတ်စွာဘုရားဆိုတဲ့ ဂုဏ်တော်ကို ပိုပြီးကြည်ညိုသဒ္ဓါပွားမိပါတယ်။

Read 0 Comments... >>

ကိုယ့်ကြောင့် ကိုယ့်သာသနာ..

24 February 2010

ခုတလော အွန်လိုင်းပေါ်မှာ ဘာသာရေးကို အခြေခံပြီး ပုတ်ခတ်ပြောဆိုနေကြတာတွေ မြင်တွေ့နေရပါတယ်။ ဒါဟာအင်မတန်မှ အရုပ်ဆိုးအကြည်းတန်စေပါတယ်..။ ကိုးကွယ်မှုဆိုင်ရာဆိုင်ရာတွေမှာ သူ့ခံယူချက် သူ့ယုံကြည်ချက်တွေနဲ့ မြတ်နိုးကိုးကွယ်နေကြတာတွေ ရှိကြပါတယ်။ ကိုယ့်ယုံကြည်ကိုးကွယ်မှုကို ထိပါးပုတ်ခတ်လာတာတွေကို လက်သင့်ခံလို့မရသလို.. အခြားဘာသာတွေကို ပုတ်ခတ်စော်ကားမှု ပြုနေတာကိုလည်း အားပေးအားမြောက်ပြုဖို့ မလိုအပ်ပါဘူး။ အဓိကကတော့. ကိုယ်ကိုးကွယ်ယုံကြည်ရာဖြစ်တဲ့ ကိုယ့်သာသနာရဲ့တန်ဖိုးကို မြှင့်ပေးချင်တယ်ဆိုရင်.. မိမိကိုယ်တိုင်ပဲ မြင့်သထက်မြင့်လာအောင် စွမ်းဆောင်ပေးနိုင်စွမ်းရှိသလို.. နိမ့်ကျအောင်လုပ်မယ်ဆိုရင်လည်း မိမိကိုယ်တိုင်ပဲ နိမ့်ကျသထက် နိမ့်ကျအောင် လုပ်နေသလိုတွေ ဖြစ်နေတတ်တယ်ဆိုတာ သိဖို့လိုအပ်ပါတယ်။ အဲ့ဒါအဓိကအကြောင်းရင်းပါ။ အချို့တွေက ကိုယ့်သာသနာကိုထိလာရင် အရုပ်ဆိုးအကြည်းတန်စေတဲ့ စကားတွေနဲ့ ပြန်လည်ချေပတာတွေ ရှိတတ်ပါတယ်။ ဒါတွေဟာ သာသနာကို ချစ်နေသလိုလို.. ကာကွယ်နေသလိုလိုနဲ့ နိမ့်ကျသည်ထက် နိမ့်ကျအောင် လုပ်နေတာနဲ့ တူပါတယ်။ ဒါကိုတော့ ဗုဒ္ဓဘာသာတွေအနေနဲ့ အဓိကသိထားဖို့ လိုအပ်ပါတယ်။

Read 0 Comments... >>

သာသနာထွန်းကားတယ်ဆိုတာ..

24 February 2010

သာသနာဆိုတာ အဆုံးမဆိုတဲ့ အဓိပ္ပါယ်ပါ။ ဗုဒ္ဓသာသနာဆိုတာကတော့ ဗုဒ္ဓရဲ့အဆုံးမပါ။ သာသနာဆိုတာကို အခြေခံပြီးတော့ အမျိုးမျိုး သုံးနှုန်းထားတာတွေ ရှိပါတယ်။ သာသနာပြုတယ်တို့.. သာသနာထွန်းကားတယ်တို့.. သာသနာသန့်ရှင်းရေးတို့.. ဆိုတဲ့စကားအရပ်ရပ်ကို ဗုဒ္ဓဘာသာဝင်တွေ တော်တော်များများ သုံးကြပါတယ်။ အဲ့ဒီ့အမျိုးမျိုးတွေအထဲမှာ ကျွန်တော်အပြောချင်ဆုံးကတော့ သာသနာထွန်းကားတယ်ဆိုတဲ့ အသုံးနှုန်းလေးပါ။ အဆုံးမထွန်းကားတယ်ဆိုတဲ့ စကားပေါ့။ သာသနာတော်ကြီး စည်ပင်လာတယ်.. ထွန်းကားလာတယ်ဆိုတာ ဘာကိုဆိုလိုတာလဲ။ ဗုဒ္ဓဘာသာထဲကို ၀င်ရောက်လာတဲ့သူတွေ များသထက် များလာတာလား.. ဒါမှမဟုတ် ဘုရားရှင်ရဲ့သာသနာကို ၀င်ရောက်ပြီး ရှင်ရဟန်းပြုတဲ့ ရဟန်းသံဃာတွေ များသထက် များလာတာလား.. ဒါမှမဟုတ် ရွှေစေတီကြီးတွေ တ၀င်းဝင်းနဲ့ ဘုရား၊ ကျောင်းကန်တွေ ပေါများလာတာလား.. ဒါမှမဟုတ် တရားရိပ်သာတွေ တရားစခန်းတွေမှာ ရိပ်သာဝင်တဲ့လူဦးရေတွေ များသထက် များလာတာလား ဆိုတဲ့ လားပေါင်းများစွာအပေါ်မှာ အခြေခံပြီး စဉ်းစားကြည့်မိပါတယ်။ အဲ့လိုမျိုးတွေ များသထက် များလာတာဟာ သာသနာထွန်းကားလာတာလား…။

Read 0 Comments... >>